وہ پرور گار تمہارے اعمال کا دیکھنے والا ہے

وَهُوَ مَعَکُمْ أَیْنَ مَا کُنتُمْ وَاللَّهُ بِمَا تَعْمَلُونَ بَصِیرٌ ۞

 

 اور وہ( پروردگار)تمہارے ساتھ ہے تم جہاں بھی رہو اور وہ تمہارے اعمال کا دیکھنے والا ہے_

حقیقت میں یہ احساس کہ وہ ہر جگہ ہمارے ساتھ ہے،نہ صرف ہم کوعظمت وشکوہ بخشتا ہے بلکہ ہمارے نفس کواعتماد واطمینان عطاکرتاہے اور شجاعت وشہامت پیدا کرتاہے اوراس کے علاوہ اسے یعنی ہمارے نفس کوشدید ذمّہ داری کااحساس دلاتاہے ،کیونکہ وہ ہرجگہ حاضر وناظر اورنگراں ہے ۔اس کی قربت کایہ احساس ایک عظیم درسِ اصلاح ِ احوال ہے ،جی ہاں یہ اعقاد انسان کے لیے تقویٰ ، پاکیزگی اورکامیابی کابنیادی سبب ہے اوراس میں اُس کی (انسان کی )عظمت وبزرگی کی رمز بھی پنہاں ہے ، یہ ایک حقیقت ہے کہ وُہ ہمیشہ ہرجگہ ہمارے ساتھ ہے ۔ یہ کوئی کنایہ یا مجاز نہیں ہے بلکہ ایسی حقیقت ہے جودلپذیر ، عقل انگیز اوررُوح پروربھی ہے اورہمارے دلوں میں رعب پیدا کرنے کے ساتھ ساتھ ہمیں احساسِ ذمہ داری بھی دلاتی ہے ۔اسی لیے ایک حدیث میں پیغمبراسلام (صلی اللہ علیہ وآلہ وسلم)سے منقول ہے کہ آپ (صلی اللہ علیہ وآلہ وسلم)نے فرما:

انّ من افضل ایمان المرء ان یعلم ان اللہ تعالیٰ معہ حیث کان

انسان کے ایمان کاافضل ترین درجہ یہ ہے کہ وہ یہ سجھے کہ جہاں کہیں بھی وہ ہے خدا اس کے ساتھ ہے ( 2) ۔

ایک اورحدیث میں ہمیں ملتاہے ،کہ حضرت موسیٰ علیہ السلام نے سوال کیا: این اجدک یاربّ؟ پروردگار میں تجھے کہاں پاوں؟ (قال یاموسیٰ اذاقصدت الی فقد وصلت الیّ)فرمایا اے موسیٰ توجیسے ہی میرا اِرادہ کرے ( توسمجھ لے )کہ مجھ تک پہنچ گیا( 3) ۔

 

١۔تفسیرنمونہ

2۔ درالمنثور ،جلد ٦ ،صفحہ ١٧١۔

3۔رُوح البیان ،جلد ٩ ،صفحہ ٣٥١۔